انتا السبب ،، تعرف على اسباب ضعف المحتوى العربي على الانترنت

المحتوى العربي بيمثل تقريبا من 2 - 3 % على الإنترنت، ولما بنتكلم عن المحتوى العربي يبقى بنتكلم عن المعلومات أو المقالات أو الأبحاث أو المواقع المتخصصة في مجالات معينة بتقدم لك معلومات موثوقة مش من منقولة من أبو نواف ويعطيك العافية مشكور يا أخوي، أو صورة كوميك على موقع تواصل فيها حكمة وخلاصة تجربة سنين لطفل عنده 13 سنة.

المحتوى العربي يا إخوانا اللي مخلينا مبنعرفش نكتب أي موضوع كويس من غير اللجو للبحث الأجنبي وجوجل ترانسليشن، إيه سر قلته بالشكل ده ؟ ولو أنت مش واخد بالك إنه دي نسبة قليلة فخد بالك دي نسبة كارثية ! مش قليلة بس لما تعرف إنه عدد مستخدمي الإنترنت من العرب حوالي 90 مليون من أصل 344 مليون مواطن عربي.

ندخل على الأسباب :
1- أمية إلكترونية، بنستخدم الإنترنت للعب ومواقع التواصل وكام لايك على كام تعليق، وفي حال إنه تم نشر خبر بيكون للاسف أغلبها مش موثوق المصدر، ليه ؟ ندخل على السبب التاني.

2- صحافة صفرا، مواقع إخبارية كتير للإسف بتشتغل بنظام الصحافة الصفرا، صحافة الفضائح، شاهد قبل الحذف، يا إما ناقلين الخبر أو مترجمينه غلط وبعدها نقلوه للجماهير علشان تقراه ( ولنا في عدم إستخدام كاميرون دياز لمزيل رائحة العرق عبرة ).

3- منتديات أبو نواف وثقافة الفتي والأساطير والخرافات اللي منتشرة إنتشار رهيب في مواقع الشات وطبعا إنتقلت بعدها لمواقع التواصل، النقل الأعمي اللي مبيقدمش أي جديد بالعكس بيرجع بينا لورا بالفكر.

4- الصيت ولا الغنى، فيه مواقع عربية كتير مشهورة وعليها إقبال من المتابعين بس مبتقدمش أي جديد، ليه ؟ مش شغلانتها بمنتهى البساطة.
زي مواقع التسوق الإلكتروني، مواقع التعارف للجواز، مواقع خدمة تأجير سيارات، وهكذا وهكذا.

5- مافيش ثقافة صناعة المحتوى، ( صناعة والمحتوى ) الكلمتين مش كدة وخلاص، الكتابة للويب أو تقديم محتوى عربي جيد دي صنعة، محتاجة نأسس لها كويس في عقول الناس بداية من التعليم في المدارس وشرح إزاي طرق الكتابة والتنسيق والبحث، الموضوع مش رص حروف جنب بعض.

6- بنتعلم بالإنجليزي، ولما الدكتور بيطلب منك بحث بتروح تدور بالإنجليزي، ولو حتى حاولت تدور في العربي مش هتلاقي، طبعا ده للأسف بيرجع برضة لتأخر العالم العربي بشكل عام في مجال البحث العلمي ومساهماته فيه، بس الموضوع برضة بقى فيه بذرة أمل بمواقع التعليم الإلكتروني العربي اللي بدأت تظهر، وإحنا هنبقى منهم 

7- المواقع المتخصصة، خلينا نقول إنه إلى حد ما بدأنا نشهد تطور في الموضوع ده مؤخرا، وبقى فيه مواقع متخصصة لمجالات مختلفة بتحاول تقدم معلومات قيمة فعلا، بس إحنا ينقصنا كثرة هذه المواقع وتنوعها بشكل أكبر من اللي هي عليه دلوقتي كمان، كمثال بسيط لو حد مش فاهم، بنتكلم عن مواقع تكون مهتمة بالتكنولوجيا فقط، أو التاريخ فقط، أو الفنون فقط، … إلخ.

وعلشان نبقى منصفين برضة في بحثنا النهاردة عن محتوى يكون مصدر نكتب من خلاله إجابة السؤال لجأنا لمقالتين في موقعين من أفضل المواقع اللي بتساهم في إثراء المحتوى العربي على الإنترنت، Wamda و Sasa Post ساسة بوست .

#ملكش_حجة

#شير_في_الخير

#engasm89

ملكش حجة مبادرة نشر العلم بالمجان
engasm89